Навіны » Беларусь » 13 ліпеня 2009 а 9⁴⁶

Актывісты ГейБеларусі прынялі ўдзел у фестывалі «Endorphin» у Воршы

На фестывалі альтэрнатыўнага мастацтва і моладзевых праектаў «Endorphin», што прайшоў пад адкрытым небам Воршы, праспявалі пра лысіну на БТ, зладзілі перформансы пра каханне да злодзеяў, а міліцыянеры выказалі жаданне зрабіць сабе боды–арт.

Ідэю фестываля «Endorphin» (эндарфін — гармон шчасця) месяц таму прыдумалі за гарбатай чатыры жыхары Воршы — Руслан Канавалаў, Алена Калодкіна, Сяргей і Святлана Ластоўскія. Яны звярнуліся да мясцовых улад з просьбай выдзеліць пад гэту мэту базу гарадского цэнтра культуры. Памяшкання арганізатарам не далі, але дазвол на правядзенне фестывалю быў атрыманы.

Вечарам 10 ліпеня моладзь з Воршы і бліжэйшых гарадоў сабралася пад адкрытым небам на прыватнай тэрыторыі ў цэнтры горада.

Фэст пачаўся з выступу маладога барда з Рэчыцы Арцёма Зэбера, які пад гучныя воплескі праспяваў пра тое, што «на БТ чья–то лысина блестит, ОНТ мне усами шевелит, даже Лад мне культуру заменил».

Актывісты ГейБеларусі Сяргей Енін і Сяргей Прадзед на моладзевым фестывалі рабілі крэатыўныя прычоскі і малявалі на целе.

Маладога выканаўцу затым падтрымалі рок–гурты M.E.S.T. (Ворша), «Гольфстрым» (Наваполацк) і бард Зміцер Бартосік.

Тым часам у закінутым доме была зладжана выстава сучаснага мастацтва і фатаграфіі.

Супрацоўнікаў міліцыі, якія прыйшлі на фестываль, так уразіла распісванне мадэляў, што яны выказалі жаданне пафарбаваць сваі целы ў прафесійны сіні колер. Мастакі паабяцалі дамаляваць бонусам на іх целах пагоны і берцы.

Мінскі тэатр перформансу «Без шуму и пыли» паказаў гледачам некалькі гісторый пра закаханасць, якой скарысталіся злодзеі.

Андэграўндны фестываль прайшоў без эксцэсаў.

Паводле «Салідарнасць»

Аўтар артыкулу: Руслан Гарбачоў, фота аўтара

 Надрукаваць  Адаслаць спасылку сябру  Атрымаць копію  Камэнтаваць