Навіны » Беларусь » 12 ліпеня 2009 а 16²⁴

Ідзе падрыхтоўка пятай беларускай ЛГБТ–канферэнцыі

Праваабарончы праект ГейБеларусь пад патранажам Камітэта Міжнароднага дня супрацьдзеяння гамафобіі (Францыя) займаецца падрыхоўкай канферэнцыі «ЛГБТ–рух і няўрадавыя арганізацыі. Перспектывы супрацоўніцтва з сектарам НДА і актыўнай грамадзянскай супольнасцю для пераадолення гамафобіі ў беларускім грамадстве». Сярод запрошаных: еўрапейскія і беларускія палітыкі, актывісты еўрапейскага, беларускага і расійскага праваабарончых рухаў, а таксама прадстаўнікі розных няўрадавых арганізацый і ініцыятыў.

«Для нас важны ўдзел кожнай арганізацыі і ініцыятывы, якая прадстаўляе актыўную грамадзянскую супольнасць. Мы гатовыя да супрацоўніцтва, размовы і дыялога, і мы з лёгкасцю гэта дэманструем. Мы заклікаем далучыцца да канферэнцыі НДА–сектар, грамадскіх актывістаў і палітыкаў! Будзе карысна пабываць на мерапрыемстве хаця бы дзеля таго, каб выслухаць ЛГБТ–актывістаў і задаць ім пытанні, якія хвалююць і цікавяць». — паведамляе лідар ГейБеларусі Сяргей Андросенка.

Ужо канферэнцыю падтрымаў старшыня Беларускай Партыі «Зялёныя» Алег Новікаў, які паабяцаў выступіць перад прысутнымі з прамовай. Намесніца старшыні Беларускага Хельсінкскага Камітэта Таццяна Гацура таксама ўжо выказала жаданне прысутнічаць на канферэнцыі.

Да ўсяго Аргкамітэт канферэнцыі мае магчымасць кампенсаваць выдаткі на дарогу (цягнік, аўтобус) тым удзельнікам з Беларусі, якія пастаянна жывуць па–за Мінскам.

Выдаткі па арганізацыі канферэнцыі на сябе ўзяў праваабарончы праект ГейРасія, таксама вялікую дапамогу ў арганізацыі гэтага важнага мерапрыемства аказвае асабіста лідар ГейРасіі, старшыня Аргкаімітэта Маскоўскага гей–прайда Мікалай Аляксееў.

Прозвішчы замежнікаў, якія плануюць наведаць канферэнцыю, не раскрываюцца, каб у гасцей не ўзнікла праблем пры атрыманні беларускай візы.

Працоўнымі мовамі канферэнцыі будуць англійская, расійская і беларуская.

Да 10 верасня ўсе жадаючыя могуць паведаміць аб сваім жаданні прыняць удзел у канферэнцыі або ўдакладніць інфармацыю. Дасылайце свае лісты на: lgbt_dont_want_spam.belarus_dont_want_spam@dont-want-spam-gmail.com

Увага! Уваход на мерапрыемства будзе строга па спісе, усім жадаючым прыняць удзел у канферэнцыі, абавязкова загадзя трэба прайсці рэгістрацыю.

Аўтар артыкулу: Сяргей

 Надрукаваць  Адаслаць спасылку сябру  Атрымаць копію  Камэнтаваць