Навіны » Беларусь » 17 лістапада 2009 а 6⁰³

Праваабарончы праект «ГейБеларусь» прынялі ў склад Асамблеі няўрадавых дэмакратычных арганізацый Беларусі

Такім чынам «ГейБеларусь» стала першай арганізацыяй у складзе Асамблеі, якая будзе прадстаўляць інтарэсы ЛГБТ-супольнасці. Заява ГейБеларусі на ўступ у Асамблею НДА Беларусі была разгледжана на апошнім паседжанні Рабочай групы Асамблеі, якое адбылося 16 кастрычніка 2009 года. Зараз праваабарончы праект з’яўляецца паўнапраўным сябрам буйнейшага ў рэспубліцы аб’яднання грамадскіх арганізацый і ініцыятыў. Да гэтага 7 і 8 сакавіка 2009 кіраўнік праваабарончага праекта «ГейБеларусь» Сяргей Андросенка стаў першым прадстаўніком гей-руху, які прыняў удзел у Асамблеі.

ГейБеларусь прынялі ў склад Асамблеі НДА з другой спробы. У красавіку па выніках працы папярэдняй Рабочай групы Асамблеі ГейБеларусі было адмоўлена ў сяброўстве. Праект выправіў пазначаныя хібы і адразу назаўтра падаў дакументы з паўторнай спробай атрымаць сяброўства. Зараз праект з’яўляецца паўнапраўным сябром Асамблеі. Праект «ГейБеларусь» мае на мэце актыўна выкарыстоўваць магчымасці Асамблеі для станаўлення камфортнага і бяспечнага пражывання прадстаўнікоў ЛГБТ-супольнасці ў Беларусі, для прасоўвання талерантнага стаўлення да ЛГБТ і для барацьбы з палітычнай і сацыяльнай гамафобіяй у краіне.

Даведка:

Асамблея НДА (спасылка на сайт) - найбуйнейшае ў Беларусi аб’яднаньне грамадскіх арганізацый ды ініцыятыў, якiя вызнаюць дэмакратыю і незалежнасць Беларусі як свае каштоўнасці, і злучылі свае сілы дзеля абароны сваіх правоў ды інтарэсаў, дапамогі ў станаўленьні арганізацыяў, наладжвання сувязяў, абмену інфармацыяй і ідэямі.

Заснаваная ў 1997 годзе.

Аб’ядноўвае 264 (21.04.2009) арганізацыі ды ініцыятывы з усіх рэгіёнаў Беларусі па розных кірунках дзейнасці: праваабарончы, моладзевы, сацыяльны, экалагічны, адукацыйны, жаночы, падтрымка іншых НДА.

Місія:

Асамблея спрыяе развіццю арганізацыяў-сябраў і станаўленню грамадзянскай супольнасці ў Беларусі.

Асноўныя мэты:

• прасоўванне і адстойванне інтарэсаў НДА Беларусі;
• забеспячэнне камунікацыі паміж грамадскімі арганізацыямі;
• дапамога ў працы НДА;
• маніторынг, аналіз і ацэнка стану грамадскага сектару і прававога становішча.

Арганiзацыйныя прынцыпы:

• добраахвотны ўдзел і самастойнасць арганiзацыяў-сябраў;
• неўмяшанне Асамблеі ва ўнутраныя справы арганізацый - сябраў Асамблеі;
• роўныя правы сябраў Асамблеі;
• дэмакратычныя працэдуры прыняцця рашэнняў;
• салідарнасць і супрацоўніцтва сябраў Асамблеі дзеля дасягнення агульных мэтаў.

Аўтар артыкулу: ГейБеларусь

 Надрукаваць  Адаслаць спасылку сябру  Атрымаць копію  Камэнтаваць