Навіны » Беларусь » 11 чэрвеня 2010 а 1²⁴

Сяргей Прадзед выступіў на арганізаваным нацболамі мітынгу супраць кантролю за інтэрнэтам

10 чэрвеня ў парку Дружбы народаў прайшоў санкцыянаваны мітынг з нагоды ўказу № 60. Указ уключае шэраг навацый, мэта якіх — кантроль за канчатковымі карыстальнікамі. Да мітынгу далучыліся і актывісты праваабарончага праекта GayBelarus.By.

Большасць удзельнікаў прасдаўлялі «Рух будучыні» ды незарэгістраваных нацыянал-бальшавікоў. Галоўны рэдактар часопіса «GAY: good as you» Сяргей Прадзед заявіў на мітынгу, што прадстаўляе ініцыятыву «ГейБеларусь»: «Мне сумна, што грамадзкасць не падтрымала гэты мітынг. Хтосьці пабаяўся “чырвоных”, хтосьці па іншых меркаваннях. Асабіста я прадстаўляю ініцыятыву «ГейБеларусь» і я не пабаяўся прыйсці сёння сюды, каб выказацца супраць гэтага загаду, таму што гэта апошні голас свабоды, гэта апошняе, праз што мы можам данесці нейкую інфармацыю да людзей».

Аляксандар Лукашэнка, выступаючы на прэсавай канфэрэнцыі ў канцы мінулага году, паставіў задачу наўпрост: карыстальніка інтэрнэту павінна быць магчыма пры неабходнасці ідэнтыфікаваць. Указ прэзыдэнта № 60 гэтае патрабаванне ўлічвае.

У парку Дружбы народаў сабралася каля паўсотні чалавек. Гэта і прадстаўнікі нацыянал-бальшавікоў, і сэксуальных меншасцяў і «Руху будучыні». Дарэчы, апошняя арганізацыя якраз і ўтварылася дзякуючы інтэрнэту — яе ўдзельнікі знайшлі адзін аднаго праз сацыяльную сетку "ВКонтакте", аб’ядналіся й афіцыйна зарэгістраваліся.

Нацыянал-бальшавікі, якіх была большасць сярод удзельнікаў, паведамілі Радыё Свабода, што іх сайт зарэгістраваны ў Канадзе. І цяпер яны абсалютна перакананыя, што ў Беларусі іх ніколі не зарэгіструюць. Раней нацболы былі вядомыя негатыўнымі акцыямі: антысеміцкімі лозунгамі на платах, апаганьваннем сядзібы БНФ, латыскага й літоўскага пасольстваў. Але гэтым разам яны прыйшлі патрабаваць дэмакратыі, гучней за іншых скандавалі «Свабоду інтэрнэту!».

Нацыянал-бальшавікі заклікалі 23 чэрвеня сабрацца а 19-й гадзіне на плошчы Свабоды. Яны сказалі, што месца гэтае невыпадковае. Яны лічаць, што наступ на інтэрнэт азначае для маладых людзей, асабліва для інтэлектуальных, для студэнтаў, крок назад.

За акцыяй назіралі прадстаўнікі міліцыі і некалькі амонаўцаў. Яны не ўмешваліся ў ход мітынгу.

Указ уступае ў сілу з 1 ліпеня.

ГейБеларусь ужо паведамляла, што ўжо становіцца дасяжнай і праз GayBelarus.Org.

Аўтар артыкулу: ГейБеларусь

 Надрукаваць  Адаслаць спасылку сябру  Атрымаць копію  Камэнтаваць