Навіны » Беларусь » 14 красавіка 2009 а 4³¹

Юныя дыпламаты абмяркуюць праблему выканання правоў ЛГБТ на канферэнцыі ў Мінску

Трэцяя Беларуская Міжнародная мадэль ААН, арганізаваная Рэспубліканскім грамадскім аб′яднаннем «Беларуская Асацыяцыя клубаў ЮНЭСКА» пры падтрымцы Прадстаўніцтва ААН у Рэспубліцы Беларусь, Міністэрства адукацыі Рэспублікі Беларусь, Міністэрства замежных спраў Рэспублікі Беларусь, Нацыянальнай бібліятэкі Беларусі, Беларускага камітэта моладзевых арганізацый, Упраўлення па справах моладзі Міністэрства адукацыі Рэспублікі Беларусь, Нацыянальнага цэнтра творчасці дзяцей і моладзі праходзіць ў Мінску з 12 па 15 красавіка.

У інтэрв′ю парталу Gay.by, дырэктар канферэнцыі Вольга Хабібуліна адзначыла: «Тэма правоў ЛГБТ абмяркоўваецца на высокім узроўні, у тым ліку і ў ААН, а паколькі мы мадэлюем працу ААН, то і гэтае пытанне было занесена ў план дня. Падчас працы мы спадзяемся знайсці практычныя меры па абароне дадзенай сацыяльнай групы, а самае галоўнае, каб разбурыць стэрэатыпы, якія ў дадзены момант могуць быць у ўдзельнікаў канферэнцыі».

Агульная тэма канферэнцыі: «Прасоўванне роўнасці: Барацьба з ўсімі формамі расізму і ксенафобіі», а ў рамках Камітэта па правах чалавека будзе разгледжана пытанне аб наданні роўных магчымасцяў у грамадстве для прадстаўнікоў сэкс–меншасцяў. Дадзенае пытанне ўпершыню ўключана ў план дня і, як чакаецца, стане адным з самых «гарачых» у плане дня.

У канферэнцыі прымаюць удзел школьнікі і студэнты з Беларусі, Украіны, Расіі, Нямеччыны, Літвы.

Мадэль ААН уяўляе сабою навукова–адукацыйную ролевую гульню, падчас якой мадэлюецца праца органаў Арганізацыі з прытрымліваннем рэальных правілаў працэдуры, з улікам іх функцый і паўнамоцтваў.

Мадэляванне накіраванае на падвышэнне ўзроўню ведаў школьнікаў і студэнтаў аб механізме працы ААН і дазваляе ім апынуцца на месцы дыпламатаў, якія абараняюць інтарэсы сваёй дзяржавы падчас абмеркаванняў найболей актуальных праблем, што стаяць перад міжнароднай супольнасцю.

Працоўнай мовай канферэнцыі з′яўляецца ангельская.

Паводле Gay.by

Аўтар артыкулу: Сяргей

 Надрукаваць  Адаслаць спасылку сябру  Атрымаць копію  Камэнтаваць